Ako'y Panginoon kung inyong tawagin,
Ngunit ako nama'y ayaw ninyong sundin,
Ang pita ng laman ang inyong hangarin,
Ang mga utos ko'y ayaw ninyong tupdin.
Sinasabi ninyong ako ang liwanag,
Ngunit ako'y hindi ninyo minamalas
Ang lambong na itim ang inaaninag
Ang tiwaling aral agad tinatanggap.
Hindi ba't marunong kung ako'y tawagin,
Ano't ang aral ko'y ayaw n'yong pansinin
Ang mga aral kong aking ibinilin
Sa mga apostol at kahalili rin.
Kung sabihin ninyo ako ay ang daan
Ngunit hindi ako ang nilalakaran
At ang mga taong aking binilinan
Winalang-halaga minaliit na lang.
Kaya't kung mayro'n mang matamis ang dila
Babalukto't sa 'yong pananampalataya
Sa kanilang pakli huwag maniwala
Wikang pabulaklak lahat ay 'di tama.
Ang tunay na ginto ilubog sa putik
Sa haba ng taon ibaon iligpit
At sa walang hanggang panahong mahigpit
Iyahon at ginto lilitaw ring pilit.
Ganyan kabusilak ang ating Simbahan
Sa mga pangaral ay totoo't tunay
Mula sa pagsibol ngayon at kailan man
Espiritu Santo'y palaging gagabay.
Walang komento:
Mag-post ng isang Komento