PINAGTAGPO NG PANAHON

LAS CASAS FILIPINAS DE ACUZAR

Hindi hadlang ang lakas ng ulan upang tuntunin ang mahabang daan patungo sa “Las Casas Filipinas de Acuzar” sa Bagac, Bataan. Ito ay lugar kung saan muling nagtagpo ang landasin ng mga Past presidents na bumuo sa Soroptimist Bulacan North (SIBN).

Tunay na napakahalaga ng lugar na ito sapagkat kakakitaan mo ito ng mga lumang bahay na nanggaling sa iba’t-ibang sulok ng Pilipinas.  Ito ay araw ng pagbabalik-tanaw sa mga kasaysayang kaakibat ng bawat bahay  na itinayo mula sa orihinal na kalagayan nito sa kaniyang pinanggalingan.

Kasama ang butihing Past Governor Minda A. Garcia, pinagsaluhan ang isang pananghalian, pagkatapos nito ay binalikan nila ang mga pangyayaring naganap sa loob ng dalawang taong panunungkulan sa SIPR.

Nasa isang sulok lamang ako ng bulwagan subalit dama ko ang kalakhakan, ang kagalakang pumukaw sa katahimikan ng isang maulang lugar.

Pahapyaw na nagbabalik tanaw si Past Gov. Minda at ang Gov Elect na si Tita Cherry sa mga makabuluhang pangyayaring umugit sa kasaysayan ng Soroptimist International Philippine Region (SIPR). Damang-dama ko ang pasasalamat nila sa mga Past Presidents ng bawat Bayan. Pagbabalik tanaw sa mga maliliit na hadlang na pinagtagumpayan sa sandali ng kanilang pamumuno sa SIPR.

Hindi lamang mga pangyayaring humigit sa inaasahang kaganapan ng mga mithiin ang ipinagmalaki ni Past Gov Minda, higit sa lahat ang pagkakaibigan na mas kaniyang pinahahalagahan.

Ang nakaraang SIPR Gob. Minda A. Garcia, kasama ang Gov. Elect Cherry Tumaneng at ang mga nakaraang mga Pangulo ng SI Bulacan North, ay nagbalik tanaw sa mga nakaraang kasaysayan ng mga lumang bahay sa “Las Casas Filipininas de Acuzar,” ang pagtuklas sa mga haliging bato ng kasaysayan ang naging usbong ng pagtuklas sa mas mahalagang batong nakasalig sa pamakuan ng tunay na pagkakaibigan na may kakayanang magtagal mula noon, ngayon at sa kinabukasan!

Pagoda Festival 2014:PARA SA MAHAL NA POON NG KRUS NG WAWA !

 

        Noong unang Linggo ng Hulyo taong 1850. may nakitang lumulutang na krus sa bunganga ng Bocaue River o mas kilala noon na Wawang Capiz. Hinango ang krus ng isang mangingisda at ito’y dinala sa kanyang kubo hanggang maisipan ng  mangingisda na ibahagi ang biyaya ng pagkakakita sa krus at ipinasyang dasalan ang krus ng may isang taon hanggang napagkasunduang iparada sa ilog  na nakalagay sa isang malaking Bangka. Ito rin naman ay pinaliligiran ng mga maliliit na  Bangka upang mas marami ang makidiwang sa   prusisyong ito.

Pinaniniwalaang ang itim na krus ang siyang nagdadala ng kasaganaan ng ani ng mga Bocauenyo.  Mula noon ay taon-taon ang pagdayo ng maraming deboto  sa tinaguriang Pagoda Festival  na ginaganap sa Bocaue, Bulacan.

Ika-2 ng Hulyo 1993 sa halip na kasiyahan at banal na prusisyon ang muling maranasan sa Pagoda Festival, trahedya ang naganap.  Umabot sa 500 ang sumakay  rito at sa hindi inaasahang pangyayari, lumubog at 266 ang nasawi. Ang kabanalan at kasiyahan ay napalitan ng pagluluksa at  kapighatian.

Makaraan ang 21 taon, ang mga deboto ng mahal na itim na krus ay handa na muling buhayin ang tradisyon at  pananalangin. 

Handa na raw silang mag babang luksa sa nakalipas at nais simulan ang isang makasaysayan at  pagpapasalamat sa mga biyayang tinatanggap ng mga Bocauenyo.

 Sinisiguro nila ang mas matibay na pagoda at ang paghihigpit sa bilang ng mga debotong sasakay sa pagoda.  Maging ang Kapitolyo ng Malolos sa pangunguna ni Gobernador Wilhelmino Sy-Alvarado, Chief Jim Valerio, Senior Supt. Ferdinand Divina, at Hermanidad ng Pagoda Festival  kasama rin sina G. Ruben Mendoza at mga kasama ay naglaan ng araw  upang magkaroon ng pagtataya at magkaroon ng mga batayan at alituntunin upang masiguro ang kapayapaan, katiwasayan at pagiging ligtas ng mga deboto.

Sa kabila ng puspos na paghahanda, naniniwala pa rin si G. Jim Valerio na walang hihigit pa sa taimtim na panalangin ang bawat isa sapagkat ang kapanatagan, kaligtasan at pag-iwas sa mga sakuna ay pangunahing nakasalalay sa ilalim ng biyaya at pamamatnubay ng ating Poong Lumikha.

 

BUSTOS, BULACAN: MINASA NG KASAYSAYAN!

Makailang ulit  na rin akong naging saksi sa mga pagtatanghal na ginaganap kaakibat sa pagdiriwang ng Minasa Festival sa Bustos, Bulacan. At sa bawat pagdiriwang na ito, kakaiba sa bawat taon ang ipinakikitang pagbabagong anyo ng makasaysayang kaganapang ito.

Isa ako sa mga nais lamang makakuha ng magandang larawan sa mga mananayaw ng ibat-ibang paaralang kalahok sa bawat “Street Dancing” at “Showdown Competition”. Noong una, iniisip ko na sa maringal na mga palatuntunang ito lamang natatapos ang kasiyahang dulot nito. Subalit sa bawat taon na nadadagdag, ibayong kasiyahan bukod pa ang ibayong kaalaman na siya ring sumusubaybay sa bawat mamamayan hindi lamang ng Bustos maging sa karatig bayan.

Isang simpleng pang araw-araw na pagkain, ang minasa, subalit dahilan sa pagkakataong ibinigay ng Pamahalaang Bustos, sa pamamagitan ng magiting na Alkalde Arnel Mendoza, dito nagsimula ang simpleng kaalaman kung paano ginawa ang pagkaing ito. At mula sa simpleng paraan na ito lumawig din ang kaalaman mula sa sangkap, sino ang nanguna, sino ang lumasap, hanggang sa tugaygayin ang panahon ng pagsilang ng minasa, panahon kung paano nanlumo, nalugmok at kung paano bumangon ang bayang ito.

Masasaksihan  ang ilan sa mga pagbabalik tanaw sa kasaysayan sa pamamagitan ng Imnong mismong ang Alkalde ang kumatha at mga maiikling pelikula kasaliw ang awiting nilikha na sadyang inilaan lamang sa Minasa Festival.

Lumawak na rin ang landas ng pagdiriwang mula sa simpleng Bustos, nakarating na rin ang pagdiriwang sa SM City Baliwag. Dito nagkaroon ng isang eksibisyong mga larawan ng mga pangyayaring naganap at nagaganap sa Pamahalaan ng Bustos.

Kaalinsabay nito ang pagkakaroon ng isang maikling panayam na mula pa sa mga paham ng ibat-ibang sulok ng Pilipinas na hinihikayat ang mga mamamayan na payabungin pa ang pagsasaliksik sa mga tagong yaman ng kasaysayan ng Bustos.

Minasa, isang simpleng pagkain, subalit naging daan upang matunton ang natatagong kayamanang pangkasaysayan na pinagdaanan ng mga ninuno ng Bustosenyo, ikikakawing sa mga pangyayaring nagaganap sa kasalukuyan at siya ring daan upang “masahin” ang kaunlaran ngayon at mas higit pa sa kinabukasan!

Ang mga bihasa na siyang nagbigay ng maikling panayam sa pagbubukas ng MINASA FESTIVAL na ginanap sa
SM CITY, BALIWAG!


BB. LAILA LABAJO
"Cultural Heritage Mapping"

BB. ANNE LAZARO
"Kaluto ng Bustos"

G. ARVIN D. EBALLO
"Kahalagahan ng Pananampalataya"

G. JUAN MIGUEL SAN PEDRO
"Historical Houses in Bustos"

PROF. ALBERT BANICO
"Punong Tagapagpakilala"